კომპანიამ BMW, ოფიციალურად წარმოადგინა ინფორმაცია და ფოტოები ახალი თაობის 6-Series-ის მოდელზე. ავტომობილის დებიუტი მიმდინარე წლის 20 აპრილს შანჰაის ავტოშოუზეა დაგეგმილი, ხოლო ევროპულ ბაზარზე გასაყიდად შემოდგომაზე გამოჩნდება.
ახალმა კუპემ მიიღო 70მმ-ით უფრო გრძელი საბორბლე ბაზა და სწორედ ამდენით გაიზარდა ავტომობილის საერთო გაბარიტული სიგრძე. სიახლე 39მმ-ით გაფართოვდა და 5 მმ-ით უფრო დაბალი გახდა, ვიდრე მისი წინამორბედი. კუპეს საბარგული 460 ლიტრის მოცულობისაა.
როგორც ადრე წარმოდგენილი კაბრიოლეტი, 6-Series-ის კუპეც თავიდან მხოლოდ ორი ტიპის ძრავით იქნება ხელმისაწვდომი. ერთ-ერთი მათგანია - სამლიტრიანი „ექვსიანი" ტურბოდაბერვა, რომელიც 320 ცხენის ძალას გამოიმუშავებს. მსგავსი სიმძლავრის ავტომობილს ადგილიდან 100კმ/სთ სიჩქარის აკრეფა 5,4 წამში შეეძლება და ის მიიღებს ინდექსს BMW 640i.
მეორე, ტოპ-მოდიფიკაციის მოდელი კი, აღიჭურვება რვაცილინდრიანი ტურბოძრავით, რომლის მოცულობაც 4,4 ლიტრი იქნება და ის 407 ცხენის ძალას გამოიმუშავებს. ეს მოდელი კი "ასიანს" 4,9 წამში განავითარებს, მისი მაქსიმალური სიჩქარე ელექტრონიკით შეიზღუდება და მხოლოდ 250 კმ/სთ იქნება.
უკვე სტანდარტულ აღჭურვაში ყველა ავტომობილი მიიღებს უსაფრთხოების სატელიტურ სისტემას, კლიმატ-კონტროლს, ელექტრო-რეგულირებად წინა სავარძლებს მეხსიერების ფუნქციით, უახლესი მოდიფიკაციის აუდიოსისტემას 7-დუიმიანი დისპლეითა და ბიქსენონის მთავარ ოპტიკას.
